依家泛民面對政改，又回到三十年以來經常討論的問題：面對強大嘅中國，應該點樣應對呢？借用台灣佬的講法，就係中國因素。點樣去理解及應對當下的中國因素呢？

三十年前，有班人提出民主回歸，我估呢班前輩，堅信不移都好，半信半疑都好，當時既然北京話會有民主所以死馬當活馬醫支持九七回歸都好，睇完份政改諮詢文件，都應該好明白，到咗2017年，都只會得到半桶水的民主。所以，民主回歸就正如一國兩制咁樣，全部走晒樣。

所以，泛民需要一套新嘅論述去應對中國因素。但泛民係指一堆政治光譜相當闊嘅組織，由最激進到最保守都有，無可能會統合得到一套論述，換言之，泛民最終都會有幾套論述並駕齊驅，甚至互相拉扯。

我就覺得，響應對中國之時，先係要揚棄一些，泛民內部對中國處理香港政策之舊觀念。

第一個舊思維係，中國唔了解香港之特殊性，唔理解香港人想要甚麼，再引述李瑞環紫砂茶壺論以及姜恩柱難讀的書論來引證北京其實唔理解香港，所以對港政策走晒樣。
我想講，西環經過三朝，上面港澳辦都換咗兩代，調研香港嘅人士愈來愈多，點會唔了解香港呢？What if佢哋其實好了解香港，只不過佢哋唔想俾香港人民主呢？唔想俾港人心目中嘅自由呢？唔好當北京官員個個都係鄉巴佬，係唔係？

同理，點解部分泛民冇進步，仲以為中國之主流意見係嚮往自由民主呢？What if上面真係希望穩定同經濟改善呢？有冇實事求是地想過，其實泛民係冇條件、冇能力及冇資源可以推動上面之民主呢？泛民嘅朋友，你又多了解依家嘅中國呢？

點解泛民要放棄上面嘅思維呢？上面嘅思維係基於北京珍惜香港在中國的特殊性，給予特殊看待。但中國新一代的領導，已經唔係老鄧嗰代，佢哋冇經歷過中英會談、基本法討論以及中英鬥爭等，理解唔到老鄧當年推動一國兩制之真意。佢哋眼見嘅係，中國咁偉大，登月so easy，點解仲要特殊對待港人？依家2017俾個特首選舉，已經極之俾面，你班港人仲想點？依家中國經濟強大，使靠你香港人？

假如泛民相信，依家北京對港之思路已經唔係好似三十年前咁樣，即係2017年嘅選舉，響依家領導之心目中只係一場例行公事，絕無意思真係俾你有真普選的話，其實泛民嘅option真係唔多。一係就湯渣模式，退讓就算；一係就撐硬，一拍兩散，交俾下一代繼續爭取。
去到呢度就係政治判斷之現實問題。究竟香港人要湯渣定係一拍兩散。泛民與其估估下，不如公投？有人話，公投係最冇骨氣，因為泛民議員既然係民意所選出，就已經有授權，點解仲要問選民？我就話，公投代表嘅係新民意，而且，假如公投時，市民全部都支持湯渣，咁樣泛民就無謂多拗，按公投之意見照辦！湯渣之美意，就交由全體市民決定罷！(二之二)