[轉]80後買樓

原文: http://www29.discuss.com.hk/viewthread.php...4&extra=&page=1


80後買樓

一直以黎,我係discuss都係「塘邊鶴」，好少發post.但呢排睇到唔少人講80後買樓問題，令我有感而發，同大家分享一下。

我係80後，都係大學生，仲要係三大其中一間既畢業生。一直以黎，我都係屋企既希望。一家住公屋，一家五口只有老豆萬多元收入，所以屋企都好想我大學畢業，可以改善家庭環境。但好不幸，畢業時正值03年沙士，當時大學畢業生既起薪點大概係6000至7000蚊。同年我老豆又退休，兩老都需要我份家用，真係屋漏更兼逢夜雨。

03年我寄左差唔多二百封信，見左幾十份工，都無一份請。我第一份見既工係同我本科完全唔相關既物流文員，人地問我「你咁既學歷做文員，會唔會有0的委屈?」，當然最後佢都無請我。果陣見工行到腳都損，有一次忍唔住係街度喊左出黎，問自己點解會咁慘? 最終幾經辛苦終於搵到一份同本科有關既工作，月薪8000，對當時既我，已經係欣慰。不過睇住人地學歷同我差唔多，人工高我咁多，真係覺得好唔抵。

我好記得自己第三個月出糧，係1月份，亦係第一期grant loan還錢既時候。8000蚊月薪，4000蚊俾屋企，4000幾蚊還grant loan,一出糧乜錢都無洗過就嘔突，真係心傷。果陣唔好話買樓，開飯都有問題。

果時我不時思考自己既出路，終於有一晚俾我諗到: 我成日以為自己係名牌大學畢業好叻，但諗深一層，我毫無經驗，而比起同屆畢業生，我又無過人之長，咁人地憑咩請我呢? 記得果份物流文員，人地要求我打字，但我打左老半天依然未打完，仲要錯字連篇，人地又點請我呢? 於是，我努力做資料搜集，知道原來香港有好多只需花幾百蚊去考，但政府認可既資歷、證書。我係半年間，放工後隔晚去上堂，再返屋企溫書，雖然辛苦，但考到唔少資歷、證書。

重新裝備後，我再去搵工。結果僱主睇到我呢半年不斷進修，覺得我努力、肯學，終於請左我。我終於做到自己想做既工作，人工亦加左一倍，到約16000蚊，不過之後就減薪，減左千幾蚊，但對於當時既我，好似中左六合彩頭獎咁。

多左人工，但我無亂洗錢，第一個目標唔係買樓，而係還GRANT LOAN。由於我係大學時拎到相等於一年學費既獎學金，再加上我一直以黎既儲蓄，同埋慳慳埋埋既GRANT LOAN餘款，我終於係05年，比還錢期限早三年一次過還哂GRANT LOAN。雖然無債一身輕，但荷包亦輕到飄起，又要重頭再儲。

還哂GRANT LOAN，我終於可以計劃一下自己既財政。06年我同男友計劃結婚。佢同我都係公屋妹、公屋仔，無咩家底，於是要一齊儲錢，亦計劃買樓。我地都係慳家一族，環境最差既時候兩個人分一個美X快餐食，但日子就係咁過。而我係一年半以來努力做資料搜集，睇下有咩適合既樓盤。

係努力之下，08年我地終於係市區買左一層約200萬既樓。好多人都要求買新樓，但我卻只求安樂窩。雖然樓齡10多年，只有約五百呎，但兩口子已夠住。最開心既係單位兩個房都向海，真不枉我做左咁多資料搜集，去左咁多區睇樓，終於有自己既安樂窩。單位做九成按揭，首期都係20萬，連雜費約三十萬。由於我鎖定已裝修單位去睇，連裝修費都慳返。層樓按30年，月供都係8000幾蚊(連管理費)，對而家家庭月入約4-5萬蚊既我地，負擔不重。就算上年金融海嘯，我男友俾人裁員，靠積蓄都依然供得起。

而係呢幾年，除左買樓，我地仲係早幾個月前結左婚，婚禮所有洗費由我地負責;我仲係兩年前開始讀MASTER，今年結婚兼畢業。

係咁多年黎，我都無點投資股票，但依然可以做到結婚、買樓同埋讀書，同時每個月都俾家用屋企，一切全靠儲蓄同埋財政規劃。

係呢幾年，我放棄去買名牌、買貴衫、幾乎無去過旅行。可能你會覺得好難，但如果你真係想買樓，你就會放棄得到。到而家我結左婚、買左樓，有唔少朋友羨慕，而我而家仲有大把時間可以搵錢去買呢0的奢侈品，何需急於一時?相反我有唔少朋友成日換電話，又i phone又i pod,一年去幾次日本，但就歎樓貴買唔起，我真係愛莫能助。

大學生，其實就算唔係大學生，係出黎社會工作頭幾年一定係要捱，買唔起樓係必然既。係我打8000蚊一份工仲要還grant loan既時候，我絲毫無諗過要買樓。無咁大個頭，何解要戴咁大頂帽? 如果一畢業/畢業頭幾年就個個可以買得起樓，咁即係代表樓宇已經無價值，不買也罷!而家唔少同我同齡或者年紀比我小既80後大學生，拎住學位打份萬幾蚊既工，好似我當年咁怨天怨地。少不更事固然係原因，你當然可以繼續怨，而討論區都係俾你怨既地方，你無唔0岩，但世界唔會因你怨而停住，樓依然咁貴，或者更加貴，倒不如想想點樣可以裝備好自己，搵一份人工高0的既工作啦!希望睇完我既分享後，會幫到你。

當然，我都唔認同發展商起縮水樓，同埋認為政府應該復建居屋，等人地有多0的選擇。但經我呢幾年不斷搜集資料，其實港九新界都真係有唔少百幾萬既細價樓可以買架，你去中原地圖查下各區成交就一清二楚。所謂"上車盤"，即係樓既入門階，層樓買左係可以賣架嘛!暫時住住先，待價而沽，就可以換另一層大0的既樓啦!唔需要一買買成千呎新樓呀!如果幾年都唔將就，咁就真係到頭髮白都無辦法買喇!又前年、上年既價都唔高，咁點解之前唔買，今年貴先黎話買呢?簡直違反投資原則。而家每幾年就一次調整，想買樓既無需急於一時，可以儲多兩年錢，等平0的再買啦。如果你又嫌舊樓舊，又嫌面積細，但自己又係洗慣玩慣、講求生活品味既"月光族"，咁呢個應該係你既錯，而唔係社會既錯!

社會從來分等級，安居從來唔容易，唔係都唔會有「安得廣廈千萬間」之歎。我從小就係窮人，出世時住木屋，跟住係公屋，我唔會睇唔起窮人，我而家都只不過係個草根中產。窮人安貧樂道，要比富翁無病呻吟幸福得多，你睇不時有富豪自殺既新聞就知。60、70年代既窮，係指無飯開，就餓死;80年代打後既窮，卻係指買唔起樓，買唔起i phone、電腦。

如果我到今日都買唔到樓，仲係8000蚊人工，我依然會檢討自己有咩做得唔好，繼續努力。如果自己日日係個網罵人"on9"，但寫篇文章又白字連篇、文句不通，咁點叫人俾高薪請自己呢?人貴自知，我知道自己無能力買樓，就唔會買，而唔係怨政府、怨社會唔幫自己。細個既時候見到0的零食貴，買唔起，大人都會教細路儲錢買或者睇下第二度會唔會平0的啦!唔通走去同人嘈，叫人減價咩?不過話時話，而家0的家長又真係會自己自動幫細路俾錢，或者走去話人地，真係好笑!

為咩政府一定要幫我呢?人從來都係要為自己既生活負責架啦!政府真係要幫既，就係發展經濟、創造職位，而唔係派糖!你俾條魚人，不如教人捉魚，而家政府就係成日俾魚人，好多人唔識捉魚，就問政府拎，仲要埋其他野，我睇下點收科!一個乏善足陳既政府，搞到百姓無哂志氣，一味祈求幫助，悲哀!

我會繼續為自己既生活努力，我會繼續儲錢，但今次會儲黎投資，希望有第二、第三間物業，希望各位80後大學生都唔好再自怨自艾，繼續努力，希望你地都好快有自己既物業啦!

睇完我呢篇文，如果想話我"on9"，則可免，我唔會為你一兩句而有咩損傷，但可憐你依舊係一隻無殼蝸牛。如果我篇文能對你有一點啓發，就不枉我打字打到手軟!

===============================================================

近來在各大論壇都見到都是充滿怨氣得的80後, 而本文作者則是默默耕耘, 在進入社會初期挨過, 控制支出, 盡力儲蓄, 而買到樓的人. 看過本文令人有點覺得部分現在的80後對自己期望過高.

不過話說回來, 作者說她現在家庭收入4-5萬, 其實在香港也算是較高收入, 這相信也是她早年努力的成果.

咦!出奇地香港討論區竟然沒有80後憤青出來嘈兩句

另一方觀點:

http://www.miniforum.org/showpost.fcgi?tem...=2761780&page=1

香港的中產為了實現「4仔主義」(屋仔, 車仔, 老婆仔/老公仔, BB仔) 而一生為奴,
窮畢生精力為銀行家和地產商賺錢, 雖然作者最後還是成功置業,
但作者從還 grant loan, 狂考cert, 挨過低人工, 儉省儉用,
到終於儲到首期, 借九成按揭買房, 供30年, 已經是歷盡艱辛,
以後的日子還是背著房貸做人, 在現在低息環境, 他們供樓還可以較輕鬆,
但到遲些加息, 利息成本又會增加, 如果有甚麼變動, 還是有危險的.

勤儉致富﹐怎樣也沒有飯來張口﹐錢來張手那麼過癮﹐大家沒得做伸手黨都是萬惡的政府的錯啦。

不過縱使有人能夠在現體制掙扎求存,
那也不代表死了的都是咎由自取.
我相信也有一些買不到樓的八十後也不是如一些人,
例如本文作者所言那樣,
把錢吃喝玩樂花光了,
自己不儲$有期望政府搭救.
的確有一些人一整份糧,
一些拿來供養父母,
部分日常衣食住行,
就已經花光花淨,
想儲也儲不到$.

且看香港個人收入中位數為$10000, 家庭收入中位數為$17000, 18000.
收入低一點的人或許只有7000,8000.
且看政府請文書助理都萬人空巷就知道香港的人工是多麼低了.

而作者自己本身是香港3大畢業, 所以還有升職加薪的機會,
再加上男友/丈夫一起, 所以還能夠一起負擔到首期和房貸.

但其他學歷較低的80後, 雖然也是有晉升機會, 但相對來說已經少很多.
以他們的薪金, 根本連首期也難儲, 如果再加上供樓的負擔, 很多都承受不了.

即使是大學生, 如果本身家境不佳, 而畢業時又只找到8000,9000月薪的工作,
即使逐漸加到15000左右, 如果既要還loan, 又要供養父母, 還要日常用度,
即使是還loan也可能要幾年時間, 到儲首期又幾年, 如果要結婚的人又要一舊$開銷.
文中作者和她伴侶後來的收入也已經算頗不錯的了, 所以才能夠在幾年內還清loan, 儲首期, 結婚, 讀master.

所以80後感到難以買房也不是無理取鬧的.

本篇文章已被 阿暪 於 Mar 13 2010, 12:36 編輯過

不過其實房價也不會永無止境的上升的, 到將來(可能比大家想的更近)樓市回降時可能還有較大機會買到房.
而真的沒有能力買到房的人, 政府應該多建公屋來安置他們 (實際上政府也的確一直有興建公屋的),
畢竟我認為收入低並不代表他們沒有權利尋求有瓦遮頭的.

據說某些地產商已經開始促銷豪宅單位了, 到底時暫時銷情不佳還是樓市已經見頂, 我們可以拭目以待.

本篇文章已被 阿暪 於 Mar 13 2010, 12:33 編輯過

入去得8000;9000何時才過10000?
我用excel假設每年+5%

1. 8000
2. 8400
3. 8820
4. 9261
5. 9724.05
6. 10210.2525


1. 9000
2. 9450
3. 9922.5
4. 10418.625

而且這一間已經叫良心企業