三扒兩撥泛民散晒

真假政經 - 王慧麟
三扒兩撥泛民散晒
2014年08月13日

六月至七月初，原本泛民一直佔晒政改上風，但是，就在好打得開始第一部曲之後，泛民之強勢，一鋪謝晒。

任何泛民議員都明白，呢幾個星期最大殺傷力嘅集束炸彈，就係一個網上爆嘅泛民議員們收錢疑雲。本來，收受政治獻金，香港政黨點會冇呢？問題係，泛民議員收咗錢之後，支吾以對，犯晒建制派俾人攻擊時回應失據之所有毛病，仲要係閃閃縮縮，唔敢直接面對添。

更big wok的是，由於議員收水，按程序係需要向立法會申報。呢樣嘢唔知係從寬定從嚴，如果從嚴地理解，幫政黨代收係說不過去。代收，勉強可拗係trustee，但做信託人，都係個人收水，大可先向立法會申報，過數後再向立法會講已交俾政黨，申報完就響法理上說得通。唔報咪出事咯！

然而，對於唔係議員之泛民人士，焉有不寒心之理？大教授被篤學術品格有問題，又持有外國護照；至於佔中三子，都係如常地日日攻擊。但影響最大嘅，就係議員之被圍攻。呢樣嘢，街外之泛民支持者，即使點撐，都會有疑問：喂，究竟你哋班議員，交代清楚未？如果未交代清楚，又點可以公開撐落去呢？

呢啲抹黑式攻擊，對比泛民對建制之抹紅攻擊，殺傷力更大。難怪呢兩個星期，建制派更出埋「袋住先」攻勢，順便叫埋一班上一代之前輩(大部分都係近六十或六十以上的第二、三代香港人)聯署要心平氣和講政改，一頭硬，一頭軟，令泛民議員無法招架。難怪網報都有爆，好打得響見泛民之前，已經同四位泛民議員傾過。哈哈！如果聽日係政改上去立法會表決的話，政府一定夠票通過。

所以，泛民激進派朋友，假如覺得有一種殺埋身的感覺，相當正常。因為響大時代裡面，高言大義容易，低說務實困難，假如因為有一種政治壓力令到泛民議員恐懼，最終倒下，也不應怪議員「軟弱」，坦白講，網絡上喪鬧泛民議員「賣港」，多麼容易兼零成本，但議員呢？他們的子女被狗仔隊追問點解唔去佔中，銀行戶口要公開晒俾全港市民知道佢同佢嘅伴侶無收過錢，投資買賣被捉痛腳話冇正確申報投資公司之名字，學者要解釋其沒有剽竊別人研究成果，咁樣嘅高壓氣氛，你試下？

但即使泛民議員依家處於劣勢中之劣勢，亦唔代表支持者「接受」他們在恐懼之下投票支持「袋住先」，投票支持提委門檻可以增加，支持名單制，甚至只係講提委會民主化。唔好忘記，提委會民主化響泛民裡面之支持，唔係主流，而且，最大問題係，依家當泛民注意力放在提名門檻之時，就已經墮入咗上面設下的談判圈套：即係響提委會民主化內的枝節技術轉來轉去，而唔係講緊整個制度之合理及公平性，即係話，咁樣轉落去，連公民推薦都已經暗地裡被拋掉。



不過，希望在於下一代。我估，年輕一代泛民，一定唔肯收貨。九月開學，硬仗就來！

本篇文章已被 Leaf 於 Aug 18 2014, 22:50 編輯過

剃人頭者人亦剃頭，原來指鹿為馬、顛倒黑白的威風哪去了，現在想縮沙？晚了

說反了吧，多麼容易兼零成本的不是喪鬧泛民議員「賣港」，而是喪屈建制議員「土共」、「地下黨員」，還有，嗯，「賣港」。

泛民收錢同澳洲碩件事起碼還要找証據了，訟棍倒林新強可有証據？直接以言入罪搞白色恐怖了，虧泛民還有臉喊冤，真夠無恥的。