《陰質教育》

最近大家應該在地鐵燈箱和旺角街頭都看過此劇的廣告吧，剛去看了，感覺...真係幾陰質。

先講內容，睇個名都知係講教育問題既，佢以「多元化」的角度去睇教育既問題難處：學生讀書辛苦，求學只可以為求分數；家長望子成龍，嘔心瀝血；老師既要教導頑劣學生，又要面對無理家長；校長又怕殺校，又怕縮班...學生、家長、教師、校長的角度都有，但似乎獨欠政府的「角度」，四方固然有自己的辛苦，但亦有自己的問題，為何最終矛頭只指向政府？需知提出問題固然重要，但自己也沒能力提出解決的方法，如果能要求別人「完美」地解決問題？劇終，阿頭代表講感想，特別說自己戲團被康文署迫害，更顯小氣。

其編劇其實好易做，一大堆時事問題，不時明串暗串，再幾句「名人名句」，加啲爛gag炒埋一碟就成此劇。可惜想講既時事太多，加上不少老生常談，結果成了三個鐘太長的劇。﹝我自己最後一個鐘係咁睇錶囉...諗起cashback：愈睇錶，時間只會過得愈慢，嘿﹞

再評對白，整套戲食螺絲不下數十次，明顯做錯動作亦有好幾次，一般觀眾﹝像我﹞都睇得出如此多錯，真實既錯處必然更多。整體演員大概有三十人左右，只有三個似是較專業的演員，其餘均是學生。當然唔可以要求學生的演技去到很高的水平，但有幾個人講野都唔清楚，其劇團阿頭亦多次食螺絲，明顯唔夠專業，不能接受！

佢地﹝全體﹞的演技，好聽啲叫「誇張」，難聽啲叫「浮誇」，再難聽叫「低B」，基本上同鄭中基式爛gag係冇分別。gag位又捉得唔好，一場哭戲無啦啦加個爛gag，不倫不類。有幾場自虐的戲﹝真打﹞，看似為藝術獻身，但做多兩次就令人覺得不過如此，亦不需如此。﹝例如：由始至终，舞台旁邊都有個人企係到三個鐘扮紙板公仔，無對白，只有三次動手打人的動作，開頭覺得幾特別，其實好無聊﹞

有點樣既畫劇，就有點樣既觀眾！入場多是讀緊書既年青人，觀眾席不停聽到有人講野，高聲說話，更有人大聲呵欠，離譜至極！不知專重為何物！

當然此戲亦有好既地方，舞台效果很華麗，明顯花了唔少心思；演員和觀眾亦有唔錯的interaction，現場氣氛做得不錯。可惜瑕不掩瑜，值得讚既地方實在唔多。如果你很喜歡港產爛gag片，又不太喜歡政府政策的話，強烈建議你去睇，因為現場有好多年輕人﹝憤青？﹞好enjoy呢套劇，可惜我不是。

此劇十分我頂到盡只俾三分，花了$90﹝原價$200﹞似是看學生級數既畫劇！實在唔明白為何能六次再演...

本篇文章已被 傻俠 於 Jul 25 2007, 17:54 編輯過

《好戲量》的《陰質教育》嘛~~

haha~~唔好話套劇~~個劇團本身都好陰質xddddd

um....我只看過他們的《仙都唔仙》......都幾搞笑...不過...說得難聽點都是浮誇.....

好戲量經常阻街．．．感覺是嘩眾取寵

其實，《好戲量》這個劇團本身是以街頭演出起家，街頭演出本來就沒有舞台演出的嚴謹嘛，所以就算他們把自己的劇作搬上舞台，演起來還是不脫『 jam 戲』的味道。



本篇文章已被 kinder 於 Jul 26 2007, 16:35 編輯過

但如果在正式舞台上只有街頭劇的水準，那觀眾為何花錢入場睇？對觀眾不公平吧...

《陰質教育》此劇我沒有看過，所以對於傻俠兄對此劇的感想不予置評。



至於為何吸引觀眾，原因可以很多。一來是題材的關係 ( 他們的題材大部分都是『諷刺時弊』)，二來多少都是因為其鋪天蓋地的宣傳，君不見他們的 banner 隨處可見? 三來，以此劇為例，觀眾都是以學生/青年為主，依你所說，觀眾的水準如此拙劣，我相信他們大部分都只會邊看邊共鳴邊過癮，認為此劇宣洩了他們的不滿，只會拍爛手掌，那會加以深思? 學生/青年千千萬，一傳十，十傳百，難怪長做長有。


此外，你說此劇再演六次，如果都是在『細場』演完再演的話，總觀眾量多極有限，這些數字不必多理。


haha~~他們當然不是專業啦~~除了那個『呀頭』是職業演員之外(沒記錯的話)，《好戲量》本來就是業餘劇團嘛......


p.s 康民署已經待這劇團不薄了....嘿嘿...

那個呀頭說自己劇團被康民署迫害，想博取多些觀眾的捐獻嗎 ?....
(那時《仙都唔仙》完場後，場外有攤位售賣紀念品之餘，還有捐獻箱的......嘿嘿嘿..... )

本篇文章已被 kinder 於 Jul 26 2007, 17:30 編輯過

很無聊嗎?@o@
在旺角街頭看過他們,有一次覺得還不錯,不知道進劇場去看會是這個水平